“.. BASTA KE ERA DI HIPOKRESIA! TRANSFORMA REPUDIO DEN AKSHON I PREVENSHON ..”
Loke nos komunidat mester saka for di e kaso di e rumannan beibi di Aruba
WILLEMSTAD, CURAÇAO – E suseso di abusu infantil a sakudí nos pais ruman Aruba, i Reino Hulandes kompletu. Esaki nos por a nota riba medionan sosial kon e forma ku a ranka e hobensitunan aki su bida for di mundu a kousa hopi doló, repudio i rabia. E kaso aki mester ta un yamada pa nos konfrontá ku e realidat ku nos ta bibando aden i analisá e “vangnet” ku mester ser fortifiká pa evitá mas kasonan asin’aki.
Miéntras nos ta mira e kaso ku a sakudí nos rumannan na Aruba, nos mester realisá ku aki na Kòrsou tambe mester di mes òf mas tantu atenshon pe kasonan di abusu (físiko i emoshonal) ku ta sosedé diariamente den nos komunidat. E energia ku nos ta hinka den krea mas doló i rabia mester ser transformá den akshon i kiko nos por hasi pa prevení mas di kasonan aki sosedé.
Mundu kompletu ta ser konfrontá últimamente pa e desaroyonan ku ta kibra for di e kadena visioso di kultura di miedu i enfrentá pa un era di komunikashon, transparensia i desaroyo. Kibra lòs for di e era di hipokresia, i stòp di tapa solo ku un dede.
Kaminda nos ta enfrentá den nos realidat diario:
- ku ainda nos tin muchanan/hóbennan ku ta bai skol sin kome òf bebe saludabel, miéntras tantu ta paga ‘konsùltent’ nan míles pa detektá kos ku nos tur sa sin atendé e asuntunan mes.
- Organisashonnan ta traha paralelo ke mesun metanan ku otro sin un punto di komunikashon sentral o ‘database’ di e kliente nesesario registrá pa un mihó forma di kuido.
- Den luna pasa a sali e informashon ku a haña un “feto” na Malpais, te ainda niun akshon – aborto ta sosedé na lus di dia meskos ku oumento di embaraso hubenil.
- Kresementu bou di víktimanan di abusu i violensia ta ketu bai un problema ounke tin e edukashon riba e tópiko.
- E epidemia di HIV/Aids a konosé oumento bou di su víktimanan.
- Deskriminashon i akseso pa muchanan i hóbennan ku desabilidat.
- Obesidat bou di nos muchanan.
- Uso i adikshon di droga i alkohòl a yega na víktimanan edat mas hóben i konosé kresementu drástiko.
- Ainda no tin un defensor direkto pa nos muchanan i hóbennan, un Ombudsman/Defensor di Mucha i hóben.
- Otro punto ta sigur e echo di propaganda i eksplotashon di violensia i komersialisashon seksual bou di muchanan den nos media diario ku a bira algu normal o asta ser aploudí na momentu nos mira esaki.
- E tentamentu, ‘bullying’ i diskrepansia bou di muchanan i hóbennan ku ta ser reflehá diariamente den nos komunidat ta rekerí atenshon profeshonal i kolektivo di nos komunidat.
Miéntras tur hende sa di nan derecho, nos ta lubidando riba e konsenshi moral i síviko pa sigui aportá na salbaguardiá kustumber, norma i balornan positivo.
Nos no por keda ketu mas i laga situashonnan pasa riba un nashon ku tantu potensial, p’esei mester enfrentá nos realidat i laga nos empoderá otro pa nos por siña for di nos erornan i krese. Mester uza rekomendashonnan di rapòrt di UNICEF na 2013 den akshon, òf rapòrt di salú estudiantil VIC na 2015 i hopi mas ku tin kaba.
Ban ta mas transparente, papia habri pa asina nos por konfrontá e predadornan i buska un base sólido pa yuda reforma nan. Si ta nota diskrepansia den formashon di un yu, papia i buska yudansa. E trabou nunka lo tèrminá, pero nos por marka un diferensia.
Gwendell Mercelina, Jr.
Polítiko Independiente
E Hóben Polítiko ku mas voto den historia Elektoral di Kòrsou!
www.gwendellmercelina.com
+5995130101
g.mercelina@gmail.com
Follow WENSHOW on Facebook, Twitter, Instagram, LinkedIn
WENSHOW 