#TUMBA2016 – Análisis: Nos Dos mes te Kos!

Na mi kurason ta aworakí e felisidat di por ta bendishoná di mira un dia mas!

Di por a lanta for di kama, traha tur dia pa kumpli ku mi debernan (ku kisas mi mes ta faya kuné diariamente) pero ku ta traha na ekselensia konstante i ta realisá ku mi ta parti di un komunidat úniko – kual su forsa di dos ta konvensémi ku si bo por ku Kòrsou bo por ku rònt mundu. P’esei ayera mi a publiká e dicho “Den un pais chikí, tur kos ta chikí, ménos e lenga di e pueblo!”.

“Den un pais chikí, tur kos ta chikí, ménos e lenga di e pueblo!”

Progreso di un pueblo ta kuminsá na momentu nos realisá di bèrdat ku revelashon ta bini di un hubentut, un komunidat kompletu ku ta perserverá i ku ta aspirá pa traha huntu den union ku sabiduria, eksperensia i amor. Palabranan por ta bunita, pero nos akshonnan mester demostrá esaki, asta si nos kant’é ku melodianan di angel, nos tin ku bib’é!
Despues di un ‘nochi largu di e galeria musikal, artístiko i kultural mas grandi di nos pais, i bo por bisa tambe kual ta un eksploshon di algu úniko semper ta sosedé ku e talento di e yunan di e baranka aki for di nos elekshonnan (nos ta “trendsetters” den mundu: promé ku Steve Harvey su vupa – dos aña pasa nos tambe a kita korona riba esenario di ganadónan), nos kompetensianan. Kisas algu poko bisto rònt mundu pa un género músika eksklusivo na mundu, nos tin ku balorá delaster un kos ku ta hasi nos diferente i konta nos bendishon.
Personalmente ami ta un persona ku ta stima enkurashá intelektualidat, balansa emoshonal, kresementu artístiko i spiritual individual i di un sosiedat. Karnaval sigur a siñami elevá esaki, skirbiendo mi tésis riba dje, sabiendo ku n’e momentunan aki bo ta konosé i mira fachadanan di hende ku hamas ba imaginá di eksperensia (i mi ta kòmbersá di eksperensia, ta fresku den mi memoria eksperensianan di Karnaval 40 den Reina Prens ku Pancho, komo produktor, manager i entrenadó di diferente ganadó e último añanan i sin lubidá 2013 kaminda mi ruman a bari ku un rèkòrt di 7 di 8 premio i sali promé finalista: https://youtu.be/13V0xzcKLqs).
Kada eksperensia tin ku hasi nos realisá ku kada kos tin su propósito i motibu dikon e ta sosedé, i bo no sa di kiko bida ta protehábu o premiábu ku loke bo risibí.
Djaweps último den #Siguimi mi tabata tin un análisis di e 30 finalistanan, kual mi ta kontentu ku 4 di mi Tòp 5 pronostiká den programa El gran Rey Tico Balentien https://youtu.be/ipjBN3ZqSCU, e yu fuertisimo stima Dibo Doran https://youtu.be/4tHEKHYutG8, espektakular Danny Yanga https://youtu.be/LVzo9qtepdE, i nos sabio Reinier Lijfrock https://youtu.be/Aipd9zQds7c.
Mi tòp a keda varia hopi dor entre nan, paso ku e kompetensia den un tempu korto di preparashon nan tabata super fuerte, shòk trai shòk e kurason musikal a haña, i mi’n por keda sin menshoná p’ami Djuric Virginie ku un bon trabou i kombinashon di e ku Hendrik de Windt a kousa estrago i Rei saliente Amos Balentin ta defendé su titulo manera titan.
Pa kada hende ku a partisipá i a keda premia pa un bon trabou huntu ku alrededor 60 komposishon i areglo ku a forma batakaso grandi e aña aki, kes desir si bo ta parti di e konstelashon di 2016 aki p’ami bo ta tremendo, si mi por asta bisa sublime.
Na mi opinion personal batakasonan manera Maisha Isenia e dama fuertisimo di tòp, Ritzel Godfried un kabayero perserverante ku trabou duru ta paga sigur, otronan manera Furgell Wijngaarde, Quinthony Thomasa, Remy Joss, Rich Pieter un amigu ku personal mi ta ‘gùn’ e korona pronto pero mester di un tempu pe kue forsa i ‘pòlish’ su forsa artístiko, Tico Libiee, Icho Monte, Jarnise Aitatus, Igmar La Reine ku su regreso emoshonal i Niata Augusta na mi smak.
E streanan briante, e chèri rib’e bolo i relevonan p’e titulo máksimo Tyeisha Bernabela ku Sherell Adjatay Denisia.
Pero un felisitashon di kurason ta bai na e kampion mundial di e dékada aki ku ta El Señor Maestro Gregory Jacobo Colina, ku tin un forsa i kreatividat inkreibel di gana definitivamente mané E Boy Dap di areglonan i últimamente komposishon tambe den e dékada aki di FESTIVAL DI TUMBA!
Sekuensia i smak ta distinto pa kada individuo, otro ta mas eksperto rib’e tereno di músika, melodia, entonashon, areglo, ritmo i ambiente di kaya – p’esei nan ta ser eskohí pa forma e pènel di huradonan eksperto den nan tereno pa reforsá e festival dicho ku sostenibilidat, i meskos ku tur hende tin nan mente ami si ta komprondé ku nan ko’i kome i libertat di ekspreshon ta pa nan duna kontenido.
Esaki no ta hasi si, pa motibu ku nos tin ekspreshon liber i medionan sosial ta hasi ku Yu’i Kòrsou ta produsí un berpùt di emoshon. Nos mester libra di e mentalidat robes manera ta rumannan di djaka, komehein i kangreu nos ta – den e kaso aki ta hende nos tur ta, ounke nos ta pensa ku nos por ta Win, Bob, Bill, Bebi, Liesje, Loesje i kerementu den web’i gai por pone nos pèrdè e liña di realidat.
Semper nos mester keda mantené dos pia riba tera i no laga buya ni kos di mundu bleze nos, al final ni ku karton nos no ta bai kuné rib’e trapi felisidat eterno.
P’esei nos mester respetá i asumí e realidat ku étika, i nos sa ku for di ora nos ta den un kompetensia, ta ku suerte nos ta ‘gamble’ i ku sorpresanan inesperá manera semper por sosedé. I no wòri ku na momentu algu pasa na nos interes so e ta hasi ku nos ta keda bon ku otro, nos mester ta realista, rashonal tambe i ménos emoshonal pa destruí otro. Traha bèrdat na konstruí otro ku nos opinion i pensamentu.
Kos bon ta kos di gaba, tremendo presentashon di e bandanan ku ta pone standard na nos farándula i mi ta kere fiel ku si nos ke nos por, nos por logra hopi di siña for di otro: manera di ERA e konstelashon su union ku ta brota inmenso i musikalmente sumamente harmonioso, GIO su eksperensia i saber uniko, GENTZ su estilo úniko i “trendsetter”, DREAMS e ‘survivor’ ku ta bai bataya ku un vishon steady, O’VEGA ku a demostrá di ta un banda ku por kompaña piedra i hasi nan djamanta, un kombinashon estelar di GSPOT/TUNE i revelashon di titan ku ta DOLCE sigur!
Nos no tin nodi ta renkoroso, ni kumpra guera di otro, e mundu aki ta rondó, mañan lo sorpresábu kon hendenan ku ta bati otro awe – ta kana man tene ku otro mané nada no a pasa nunka. Tur kos rib’e mundu aki ta relativo. Pues laga konten’é nos emoshon i evaluá sin ‘bash’ o desbaratá un otro – sòru pa nos buska na konstruí mas ku loke nos ke kontribuí kuné na un nashon ku nos tur ta forma parti di dje.

“Na momentu ku fanatismo gara e serebro, e ta bira un enfermedat kasi inkurabel.”

Na otro banda bo defensa apashoná, eksaherashon irashonal den kerensia, opinion o ideologia di otro ta trese prekupashon den e formashon di nos hendenan pa e direkshon o vishon ku nos ta bai!
Si nos no gar’é echo ku fe ta oro, entusiasmo ta plata, pero fanatismo ta mané pluma!
Nos lo transformá nos mes den mamífero nan irekonosibel.
Nos mester keda kòrda ku un man ta laba otro, dos man ta laba kara, kemen nos tin ku keda sa sa sa na awasa… Paso awe ta di bo, mañan ta di mi!

“Sa ku bo ta spesial, bo tin balor, kere den bo ko’ maske nan balotábu!”

Wak bo oloshi paso ta ora di baila, ora di gosa i disfrutá di bida tur momentu bai.

“Tur hende man na laira, si nos ke nos por, nanishi den un direkshon!”

Paso awor ta ora ku noblesa i sobèrbè tei duna man.
Karga nos responsabilidat i duna chèns pa kos bon brota poko! #schrikboeigenjaar
Sirbidó, #WENSHOW

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s